1994 оноос эхлэн хоёр жил тутамд уламжлал болон явагдах болсон Буриад зоны соёл урлаг, спортын Алтаргана их наадам энэ оны 7-р сарын 21-23-нд Монгол улсын нийслэл Улаанбаатар хотноо зохиогдох гэж байна. Энэ удаагийн Алтаргана их наадмыг тэмдэглэх бэлтгэл ажил Монгол улс төдийгүй хилийн чинадад ч далайцтай өрнөж буй. Тухайлбал, 2008 онд Буриадын түүх, соёлын өв уламжлалыг судлан шинжлэх, сурталчлан таниулах эрхэм зорилготойгоор байгуулагдсан Буриад судлалын академи 2010 оны 6-р сарын 23-24-нд “Нүүдлийн соёл иргэншил ба Буриад Монголчууд” сэдэвт олон улсын эрдэм шинжилгээний бага хурал амжилттай зохион явууллаа. Энэ нь тус академийн зүгээс Буриад судлалын чиглэлээр хийж буй томоохон ажлын нэг бөгөөд Орос, Хятад, Герман зэрэг орны буриад судлаач эрдэмтэд олон сонирхолтой илтгэл тавьж хэлэлцүүлсэн байна. Мөн тус бага хуралд хэлэлцүүлсэн илтгэлийн эмхэтгэл хэвлэгдэж нийтийн хүртээл болжээ. Буриад судлалын академиас Алтаргана их наадмыг тохиолдуулан өрнүүлж буй ажлын хүрээнд Буриад зоны бахархал болсон нутаг орон, ардын дуу, уламжлалт болзор зэргийг багтаасан “Саг тооной болзор” гаргасан нь мөн л ихээхэн ач холбогдолтой хэрэг болсон юм. Энэхүү “Саг тооной болзор”-ыг IV хорооллын “Эрдэм” номын их дэлгүүрт худалдаалж байна. Түүнчлэн 99127013, 99159744 зэрэг утсаар холбогдон авч болох юм байна.

Сагаангууд Б. Ууганбаяр